O 3º Campamento Galego de Veteranos de Espeleoloxía reúne esta fin de semana en Triacastela a 25 deportistas

O 3º Campamento Galego de Veteranos de Espeleoloxía reúne esta fin de semana en Triacastela a 25 deportistas, o sábado e o domingo. O campamento está organizado pola Federación Galega de Espeleoloxía, a Sociedade de Montaña Ártabros e a Xunta de Galicia e conta coa colaboración do Concello de Triacastela, a Deputación de Lugo e a Confederación de Espeleología y Cañones.

Nesta zona da montaña de Lugo localízanse pequenos afloramentos de rochas calcáreas nas que se desenvolven varias cavidades naturais –algunhas con importantes correntes de auga- que mostran grande interese para os espeleólogos galegos.

Para participar neste campamento deberase ser maior de 40 anos, ter estado federado polo menos durante 6 anos e ter a licenza do ano en curso expedida.

Cavidades que se poden recoñecer:

Nas parroquias de Alfoz, Cancelo, Lamas, Monte, Triacastela e Vilavella, nas que destacan: Cova do Bao, Cova da Galleira I e Sistema dos Arroxais.

Programa de actividades

Sábado, 14 de decembro:

10 a 11:30 horas: Recepción dos participantes e recollida de documentación no Concello de Triacastela.

12 horas: Inauguración Oficial na Sala da Cultura municipal:

• Pase do audiovisual e charla-coloquio Cova Eirós do GES Ártabros, presentado por Arturo De Lombera Hermida (arqueólogo).

• Reunión informativa sobre o Catálogo de Cavidades da FGE e planificación de actividades, que coordina: Marcos Vaqueiro Rodríguez (vogal da FGE).

• Visita ás Exposicións fotográficas: Triacastela, ‘Unha ollada ao pasado’.

15 a 20 horas: Saídas programadas por equipos ás cavidades da zona.

Como alternativa cultural poderanse ver proxeccións espeleolóxicas e facer rutas paisaxísticas.

22:00 horas. Cea de participantes e na sobremesa ‘VII Gala da Espeleoloxía Galega’, con entrega de galardóns aos Clubes e Deportistas nomeados pola FGE, que cumpriron recentemente 25 anos federados.

Domingo día 15

10 a 14 horas. Saídas programadas por equipos para prácticas espeleolóxicas. Como alternativa poderase facer rutas paisaxísticas.

17:00 horas. Clausura Oficial do 3º Campamento Galego de Veteranos da FGE.

Todos os acompañantes maiores de idade poden participar nas actividades culturais programadas sen que sexa necesario que estean federados.